رحلة للسّعادة - الحلقة الأخيرة - الختام

رحلة للسّعادة - اللون الأبيض : حلقة الختام









بسم الله الرحمن الرحيم، الحمد لله رب العالمين والصلاة والسلام على رسول الله (صلى الله عليه وسلم)، الحلقة الأخيرة، وصلنا لآخر الرحلة، وكل رحلة في الآخر لها بداية ولها نهاية، ويمكن بداية الرحلة كنا بنصور من نفس المكان، وكنا قاصدين إن نهاية الرحلة نصورها من نفس المكان، والدنيا كده والحياة كده. "رحلة للسعادة" يا رب نكون أسعدناكم أصلاً بالبرنامج. كان عندي نوايا كتيرة في البرنامج ده. كان عندي نية كنت كل حلقة وأنا داخل أصورها كنت بأنوي النية دي؛ إن أنا أسعدكم، وربنا شاهد أن دي...إن أنا عارف إن في قلوب مجروحة كتير وفي ناس مهمومة كتير وفي شباب وفي بنات محتاجين حد يكلمهم وحد يشجعهم، حد يرفع روحهم المعنوية، حد يديهم أمل.

أنا كنت دايمًا بأفكر فيهم وكنت دايمًا بأبقى شايفهم قبل كل حلقة وكنت بتخيلهم وكان ده بيديني طاقة، لأن أحيانًا كنا بنصور خارجي فبنصور في شمس وحر وتعب، لكن شعور إن نية إسعادهم كان قبل ما أستاذ علي الغول مخرج البرنامج يقول يعني "إبدأ" بأحاول أركز قوي وأتخيل البنات والشباب دول. أنا حاسس بيهم وكان جزء من هذا الإحساس إن أنا أشجعهم، أقول لهم كلمة تطمئنهم، أدخل الابتسامة على وجوههم، أقول لهم فكرة يعيشوا بها، يسعدوا بها، دي كانت نية.


كانت نية كمان حديث النبي (صلى الله عليه وسلم): "من أدخل السرور على أهل بيتٍ من المسلمين ليس له جزاء إلا الجنة"، كانت نية "أحب العبادات إلي الله ادخال السرور على الناس"، يعني كنا بنعبد ربنا بالنوايا دي، وكنت بأدخل بالنوايا دي. والحقيقة كان في نية تانية، كنت كل حلقة أقول يا رب حد يعيش بها ويبعت لنا بعد كده على عمروخالد.نت ولا على صفحتنا على الفيسبوك أو مايبعتش خالص نعرف إن إنسان أتنقل لحياة أجمل وأهنأ وأسعد بـ"رحلة للسعادة". أنا الحقيقة في حلقة الختام عندي نقط عايز أغطيها. فالنقطة الأولى كانت النية، ويا رب يتقبل منا النية دي، وأي واحد إحنا ساعدناه في البرنامج ده يدعيلنا كلنا للفريق كله اللي أشتغل البرنامج ده، ويدعيلي إن ربنا يفتح علينا ويكرمنا.



النقطة التانية الحقيقة: "من لا يشكر الناس لا يشكر الله"، ففي ناس لازم تتشكر، وأنا بقى محضر، لكن ناس كتيرة الحقيقة؛ الفريق اللي عمل البرنامج ده. عايز أشكر "بسام ياسين" المنتج المنفذ لهذا البرنامج. عايز أشكر "إيبونيت ebonite" اللي أنتجت هذا البرنامج شكر جزيل. عايز أشكر الأستاذ علي الغول مخرج البرنامج بطريقته السلسة ويمكن أنتم شوفتوا البرنامج وعشتوا معانا. عايز أشكر واحد غالي علي قوي كان بيشتغل بهمة وروح غير عادية مدير التصوير الأستاذ "غازي واكيم" واللي بذل مجهود بروح وبقلب. عايز أشكر أخويا وأنا بأقول "أخويا" لأننا بنشتغل مع بعض من أيام "صناع الحياة" مدير الإنتاج "حمزة نعيم". عايز أشكر "شيرين فارس" مساعدة المخرج الدينامو اللي كان موجود معانا في البرنامج. عايز أشكر "محمد كرزي" اللي بيتحرك لتسهيل كل حركة وإجراءات البرنامج. يمكن أنتم حسيتو بالـ... أحنا أول مرة نصور خارجي ونعمل برنامج رمضان خارجي، كنا بنعمل أجزاء من برامج رمضان اللي فاتت لها علاقة ببعض الأماكن زي قصة سيدنا موسى أو زي "على خطى الحبيب"، لكن أول مرة نعمل برنامج من الألف إلى الياء برنامج إيماني روحي خارجي. وعايز أشكر فريق التصوير "إيلي" و"جوزيف" و"ربيع" تعبوا كتير واتحركوا بالكاميرات بشكل كان فيه أحيانًا مجازفة لأن إحنا كنا بنصور في أماكن أحيانًا خطيرة، فأنا بأشكرهم جدًا جدًا جدًا. عايز أشكر "أميرة حجازي" والشغل الكبير اللي أتبذل على عمروخالد.نت هي وكل الفريق اللي أشتغلوا على عمروخالد دوت نت. عايز أشكر شاب موهوب "أحمد قدري" ويمكن لو دخلتوا على عمروخالد دوت نت وشوفتوا كمية الصور الفنية العالية واللي موجودة على الفيس بوك على صفحتي وعلى عمرو خالد دوت نت بأشكره شكر جزيل. عايز أشكر الفريق اللي أشتغل معايا وكان بيتحرك معايا بشكل يومي "يوسف بساط" و"يحيى" و"هلا" اللي بذلت مجهود غير عادي و"كنده" اللي عملت مجهود كبير. عايز أشكر "يحيى" وعايز أشكر "ميرا" و"سارة". عايز أشكر "زياد". عايز أشكر "عبد العزيز نعمان". الحقيقة... وعايز أشكر أهلي صحاب الفضل اللي ساندوني مراتي وأولادي وأبويا وأمي. معلش أنا طولت، بس كان لازم أشكر الناس دي كلها، والحقيقة في ناس تانية أنا ما قلتش أساميهم صحاب فضل وساعدوني وبذلوا مجهود معايا كبير فيسامحوني لكن هما غاليين وصحاب فضل كلهم؛ دي كانت النقطة التانية.

النقطة التالتة اللي أنا عايز أقولها في البرنامج؛ ملخص البرنامج، عايز أقول بسرعة البرنامج كان عايز يقول في الآخر: يا جماعة السعادة مش كلمة واحدة، والسعادة لو دورتلها على مسمى مش حتلاقيلها مسمى. السعادة سبع مجموعات. السعادة عبارة عن منظومة، خلطة، توليفة، عدة أبواب لازم تطرقها كلها. ما ينفعش تسيب حتة وتأخذ حتة. هي أجزاء متكاملة؛ سبع أجزاء، السبع أجزاء دي أنا عرضتهم طوال البرنامج، والسبع أجزاء دول موجودين على الموقع على عمرو خالد.نت ونزلوا في كتاب وموجودين في كتيب صغير ومفتوحين على النت، بيهم تستطيع لو كملتهم أنك تعيش سعيد. خليني أراجعهم معاكم تاني.


أحنا أول مجموعة كانت بتقول: "ارسم خطك للجنة". كانت بتقول: ابدأ بداية صحيحة. اتكلَمِت عن الإخلاص وإن أنت تبدأ حياتك مخلص لله وتعيش مخلص لله وتنجح بإخلاصك وتحط كل نجاحاتك وأهدافك للإخلاص لله.


وكان في حلقة تانية بتقول "النفس المطمئنة" إنك تسعى أنك تكون صاحب نفس مطمئنة، مش مترددة ولا أمارة بالسوء وقلنا خطوات إزاي تحصل عليها، وكله على النت اللي عايز يرجع لأي حلقة يستطيع أنه يرجع على عمرو خالد.نت حيلاقيها موجودة بالكامل وموجودة في كتاب بالكامل.


الحلقة التالتة كانت: "كن طموحًا"، أحلم لبكرة. وبكده لو تاخدوا بالكم كنا متوازنين بين احتياجات الإيمان وبين احتياجات النجاح في الحياة. إحنا كنا حريصين في البرنامج ده يا جماعة أن إحنا نقول الإيمان مش مخدر وبرنامج "رحلة للسعادة" مش بيقول لك إنسى مشاكلك المادية وعيش مع الأحلام، لأ إزاي تخطط لنجاحك، إزاي تبدأ بداية صحيحة، إزاي تكون صاحب نفس قوية، فكان في مجموعة اسمها ابدأ بداية صحيحة كان فيها جزء ديني وكان فيها جزء في إصلاح الحياة؛ حط حلم وهدف للمستقبل ورمزنا لها باللون البرتقالي؛ لون إشراق الشمس. المجموعة التانية – أنا براجع معاكم بسرعة – المجموعة التانية كان مجموعة اسمها "اسعد الناس تسعد"، عطاء، كن مثمرًا، إدي الناس حواليك، اسعد الناس من حواليك. كان في حلقة اسمها "ابذل الحب" "اعطي الحب"، وكان فيها حلقة تانية اسمها "ارحم الضعفاء والمساكين"، وكان فيها حلقة تالتة اسمها "كن إنسانًا" ورمزنا لها باللون الأخضر؛ لون الزرع والنماء والعطاء. المجموعة التالتة – ده التالت وسكة تانية – كانت اسمها "نفس نقية من موانع السعادة"، فاكرين علامة ممنوع الدخول؟ وكان فيها بقى "لا للقلق" و"لا للغضب" و"لا للحقد والحسد" و"لا للكراهية" ورمزنا لها باللون الأحمر؛ لون الخطر.


إحنا كنا بنحاول نجتهد، نقدم لكم فكرة جديدة وطريقة جديدة، حتى لو ماعرفتش تبقى سعيد مع البرنامج على الأقل تبقى عارف إيه اللي ما بيسعدش وإيه اللي بيسعد. كنا بنحاول في كل حلقة نحط إيدك على حاجة نقول لك لو عملت دي تعيش سعيد، ولو عملت دي تبقى تعيس، طب جرب معانا. فاكرين كان دايمًا الشعار اللي ماشيين به "ممكن تجرب؟"، "جرب رحلتنا"، "اطلع معانا الرحلة"، "جرب الرحلة كلها، ماتقفش في وسط السكة"، فكرة "جرب معانا" لأن الشباب بيحبوا يجربوا.
كان في مجموعة رابعة رمزنا لها باللون الأزرق؛ لون السما الصافية، كان اسمها "فلب كبير"، يرضى ويعفو، يكون فيه سماحة ويسر.


كان في مجموعة خامسة رمزنا لها باللون الأصفر؛ لون الذهب، سمناها "إرادة قوية" حتبقى زي الذهب نفسك من جوه لو نفذت المجموعة دي وحطينا فيها "الإرادة" وحطينا فيها "الصبر" وحطينا فيها "كن مستقيمًا"، فاكرين الحلقة اللي كانت على الجرف تحتينا كان الهوة السحيقة والصراط في الدنيا والآخرة؟ أنا بأفكرك بس وعمال أقول لك مجموعات مجموعات.
المجموعة السادسة كان مجموعة اسمها "علاقات دافئة"؛ علاقات أسرية وصحبة صالحة ووفاء لأصحاب الفضل.

المجموعة الأخيرة كانت مجموعة اسمها "صلة عامرة بالله"، "صلة عامرة بالسماء"؛ وقلنا فيها الذكر والتفكر في خلق الله والدعاء والصلاة، وختمنا بالسلام النفسي إمبارح، وإنهارده الختام.


سبع مجموعات، يا ترى السبع مجموعات دول استفدت منهم؟ في استقصاء موجود على عمرو خالد.نت، اطبعه وخده وكَمِّل فيه وشوف أنت مكمل قد إيه؟ بس عشان أكون واقعي معاكم وصادق معاكم قليل قوي قوي قوي اللي حيعرف يكمل كان الحلقات دي في رمضان، مستحيل يا جماعة! تكمل الحلقات في رمضان؟! إزاي يعني؟ إزاي في 30 يوم؟ يعني قليل جدًا اللي قدر يكمل الحلقات في رمضان. هنيئًا له اللي عرف يعمل كده لأن حلقات رمضان كانت تمثل الجانب المعرفي، يعني أنا بأعرفك، بأحط إيدك، بأقولك دي بتسعد ودي بتسعد ودي بتسعد، لكن هل معنى كده إنك بقيت سعيد؟ لأ، أمال إيه المطلوب؟ إنك تجربها، إنك تنفذها. كإني بأعرض عليك: ده شغلك السنة اللي جاية كله. اللي حصل في رمضان تعريفك بإيه اللي يسعد وإيه اللي ما يسعدش، بمنظومة السعادة، بالفكرة بتاعة السعادة على بعضها، الألوان على بعضها، المزيج ده، إزاي توصل لحالة السعادة، إزاي تعرف يعني إيه سعادة، إزاي تفهم السعادة، إزاي تجيبها، إزاي تحلل أنت سعيد ولا لأ لما تشوف المجموعات السبعة، لكن هل إن أنت عرفت أنك بقيت سعيد؟ لأ، أمال ده إيه؟ ده شغل تاني! يعني رمضان السنة دي عَرَّفَك. ويمكن في بعض الحلقات أنت قلت: آه تذوقتها، دي حلوة قوي، أيوه فعلاً الرضا سعادة! أيوة فعلاً أنا لما علاقتي بمراتي وأولادي اتحسنت بقيت سعيد! أيوة فعلاً لما بطلت الغضب بقيت سعيد! بعض الحلقات، لكن أنا متأكد إن مستحيل تكون كملت.


ولذلك أنا بأقترح عليك: لو عايز تعيش سعيد وتستفيد فعلاً من البرنامج ده، الإستفادة مكانتش في رمضان – طبعًا أنا ما قلتلكش الكلام ده في أول حلقة وإلا ما كنتش حتتفرج عليا فبأقول لك الحكاية دي في الآخر – الإستفادة تبدأ إنهارده. يعني إيه تبدأ إنهارده؟ ممكن تنفذ؟ ممكن تبدأ التنفيذ؟ إيه رأيك إنك تبدأ تاخد كل أسبوع أو كل إسبوعين حلقة؟ ممكن تحط خطة؟ يعني خلينا عمليين وخليني أكون صادق معاكم: أنا مش بأقول لكم خلاص كده بقينا سعداء! مفيش كده، إنما اللي أنا بأقولهلكم: ممكن تحط خطة تنفيذية إزاي تنفذ حلقات البرنامج على فترات؟ وإحنا حنعمل معاك حاجة جميلة قوي على عمرو خالد.نت إن إحنا حنحط خطة لكل حلقة. أنا مش اتفقت معاكم إن علماء النفس بيقولوا إن كل صفة عايز تعدلها محتاجة 21 يوم؟ طب إيه رأيكم لو قلنا كل إسبوعين ناخد حلقة من حلقات "السعادة" و يبقى ده برنامجنا في عمرو خالد.نت لمدة سنة؟ نحول الكلام اللي إحنا قلناه لبرنامج تنفيذي ونتابع عليه ونعمل "رحلة للسعادة" مش كمعلومات، كتنفيذ لمدة سنة ونشوف حنعيش سعداء إزاي؟ إيه رأيكم في الفكرة دي؟ مش فكرة حلوة؟ وبالتالي فإحنا من يوم العيد على عمرو خالد.نت، لأ من بكرة حتبدأ الخطة ونازلة مكتوبة بقى ومتحددة إزاي نبدأ نحولها لبرنامج تنفيذي علشان نحول الكلام اللي قلناه لخطة. وحتلاقوا بقى الحلقات كلها في شكل استقصاء وعليها لون لون وإزاي نمشي مع لون لون وإزاي نتابع لون لون، كأن ماسكين البرنامج، بس بقى خلاص عرفناه كله كمعرفة، يلا بقى ننفذ البرنامج ونحط خطة، وحيعينك على كده إن البرنامج حيبقى موجود ككتاب وككتيب صغير وحينزلDVDs والأهم من كل ده على موقع عمرو خالد.نت وعلى صفحتنا في الفيسبوك – Amr Khaled’s page – على الفيسبوك حتلاقوا الكلام ده كله بالكامل وبالتفصيل.


الحقيقة عايز أقول قبل ما نطلع الفاصل أوعى تقلق، أوعى تقلق لو لقيت البرنامج خلص وأنت بتقول: أنا ما قدرتش أنفذ حاجة من البرنامج ده! ده كده أنت الطبيعي، يعني ده المنطقي، اللي قدروا ينفذوا أكيد كان عندهم حاجات أصلاً موجودة وكملوا عليها وهما قلة ومبروك ليهم، حاجة جميلة، لكن الغالبية هي اللي حتبدأ معانا من بعد رمضان تكمل. أنا فاضل عندي أربع نقط مهمة وكده رقيقة من القلب للقلب عايز أقولها بعد الفاصل، تعالوا نطلع فاصل ونكمل مع بعض حلقة الختام؛ ختام "رحلة السعادة". أشوفكم بعد الفاصل.


بسم الله الرحمن الرحيم، الحمد لله رب العالمين، ختام "رحلة للسعادة". حتوحشونا طبعًا جدًا جدًا جدًا وربنا يبارك فيكم ويفتح عليكم. عندي نقطة تانية عايز أقولها في ختام البرنامج: عايز أقول إن فكرة السعادة هي عبارة عن...في أربع حاجات، في أربع أنواع لازم يكونوا موجودين: سعادة الروح والقلب وسعادة النفس بقوتها وعزيمتها والنوع التالت سعادة العقل أن هو ينظر للأشياء إزاي؟ زي حلقة "اختلف برحمة" إنك تنظر للإختلاف على إنه ميزة مش عيب فعقلك لما نظر للأشياء كده استريح فبقت... فمعادتش نقطة ضيق وهم، بقت نقطة جميلة، إنك تبص...يعني السعادة فيها كذا جزء، أربع أنواع فيها جزء قلبي روحاني وفيها جزء نفسي وفيها جزء عقلي وفيها جزء مادي، عندي بطالة وعايز أتجوز وعايز شقة وعايز فلوس و...، فيها جزء مادي. طب إحنا غطينا إيه في البرنامج ده في السبع مجموعات اللي كنا بنتكلم فيها؟ غطينا أول 3 جوانب.


غطينا الجانب الروحاني طبعًا، غطيناه في أول حلقة "اخلص حياتك لله" وغطيناه في المجموعة السابعة، كلها "صلة عامرة بالسماء"، "صلة عامرة بالله"، الذكر والتفكر والدعاء والصلاة، غطينا الجانب الروحاني. غطينا الجانب النفسي، غطيناه كتير، قوة الإرادة، الصبر، غطيناه وإحنا بنتكلم عن العفو، غطيناه وإحنا بنتكلم عن نفسية سهلة "كن سهلاً"، غطينا الجانب النفسي؛ إزاي تسعد نفسيًا.


وبعدين جزء عقلي غطيناه وإحنا بنتكلم عن موانع السعادة؛ "إياك والقلق" ده قرار عقلي، "إياك والغضب" ده قرار عقلي، "اختلف برحمة" انظر للخلاف على إنه ميزة ده قرار عقلي، "لا للغضب"...يعني عايز أقول إن الحلقات غطت 3 جوانب، لكن ما غطتش الجانب الرابع.


إيه الجانب الرابع؟ المشاكل المادية. وأنا كنت صريح معاكم من حلقة المقدمة. قلتلكم يا جماعة أنا في حاجات نقدر نغطيها، حأدورلك...فاكر قلت إيه؟ كنت ماسك حتى المشعل وقلت لكم بأنور مشاعل وأضواء وأنوار تخليك سعيد، وقمت قايل: أنوار من رسول الله (صلى الله عليه وسلم) للجانب الروحي والقلبي والعقلي والنفسي، قلت كده بالنص، لكن قلت لكم - وخليني أكون صريح معاكم - هناك مشاكل مادية أنا مش حأقدر أحلها؛ المحاصرين في غزة أكيد مش سعداء، اللي عايشين في العشوائيات أكيد مش سعداء، الشاب اللي عنده بطالة وواقف في الطابور بعد ما اتخرج مش عارف يشتغل أكيد مش سعيد، البنت اللي اتأخر جوازها أكيد مش سعيدة، في حاجات مادية لا يمكن برنامج رمضاني ولا يمكن إنسان لوحده يستطيع إن هو يحلها ولا في 30 يوم! إنما اللي أنا أقدر أقولهولكم إيه؟ اللي أقدر أقولهولكم إن الـ3 اللي إحنا عملناهم يديكم قوة تكملوا بها الرابعة ودي أحد نوايانا في هذا البرنامج. أنا مش عارف أديك الرابعة، وأنتوا عمالين تفتحوا الفضائيات والتليفزيونات تسمعوا مشاكل مشاكل مشاكل وخناقات على التليفزيونات وإزاي إحنا عايشين في حياة وتعب والمشاكل وبتسمعها ودي حقائق، أنا مابأقولكش تعالوا نعيش في حياة وردية مثاليـ... بالعكس! ده أنا بأقول لك استفيد من اللي إحنا عملناه في رمضان وانطلق بقوة وعزيمة لمواجهة مشاكلك المادية. أوعوا تفتكروا يا جماعة إن البرنامج ده كان كلام مخدر! أنا ماأرضاش أكون كده! بالعكس! هذا البرنامج دافع للنهضة اللي هو الحلم اللي الواحد عايش عشانه! الأمة دي حرام إنها تفضل كده! لازم تنهض! مش مكانها المكان اللي هيه فيه! لازم ترتفع وتنهض! جزء من هذه النهضة بصينا له من زاوية "رحلة للسعادة". الشباب بقى محبط وتعبان ومش عارف ينطلق، تيجي نديله حاجة تعلي همته؟ تعلي طاقته؟ هو مش كلام كده لا قيمة له، "رحلة للسعادة"، طالعين رحلة نتفسح! لأ، أنا كنت جاي أمدك بقوة، بطاقة، بعزيمة، بروح، بأمل، بنفس قوية، بنفس مستعدة تكافح بعد ما استمدت قوة وسعادة وطمأنينة. يلا بقى أنزل للحياة! أوعى ينتهي رمضان وتقول إيه: والله "رحلة للسعادة" كان جميل قوي، نرجع زي ما كنا بقى محبطين. ده أنا عملت البرنامج ده عشان تاخذ قوة وعزيمة وطاقة وأمل ونفس مشرقة وابتسام! بالله عليك، ما تفهمش البرنامج غلط ولا تفرغه من محتواه بأنك تقول: آه كان كلام حلو وخلاص! ده مش النية وده مش اللي أنا قلته وما تقولش كلامي غلط وما تغيروش، حرام عليك لو عملت كده، إنما خذ كل القوة بتاعت البرنامج وأدخل على النت تاني واشتغل بقى معانا لرمضان الجاي على عمرو خالد.نت، كل أسبوعين ناخد واحدة من الحلقات وننمي ونكبر ونتحاسب عليها ونعمل جدول محاسبة ويحكوا لنا الشباب بقى، نعيش بقى مع بعض، عندنا سنة كاملة، ناخد واحدة واحدة، علشان إيه؟ عشان نعمل نهضة، علشان إيه؟ عشان إنت تنجح في حياتك العملية. قوة وعزيمة بقى وانطلق! دي نقطة مهمة قوي قوي قوي قوي لازم كنت أقولها لك.


عندي نقطة تانية مهمة قوي عايز أقولها لك: رمضان خلص، أنت أخدت قوة وطاقة سواء من البرنامج ده أو طبعًا من عبادتك ومن صيامك، خلي بالك الشيطان كان مسلسل، الشيطان حيتفك أسره أول يوم العيد، مش كده؟ حيطلع عايز يفترسك لأن كل اللي عمله معاك السنين اللي فاتت أنت مسحته بأستيكة بصيامك وبعبادتك في رمضان. يا ترى الشيطان حيشاورلك حتسقط؟ يا ترى كل اللي قلناه في البرنامج ده والإرادة والصبر والعزيمة والنفس المطمئنة واخلص حياتك لله، حيعمل لك كده الشيطان، تقع؟ أول يوم العيد؟ ولا حتمسك نفسك؟ ولا البرنامج فادك؟ ولا رمضان السنة دي فادك؟ خلي بالك في آية صعبة قوي، بتقول إيه؟ "وَلَقَدْ صَدَّقَ عَلَيْهِمْ إِبْلِيسُ ظَنَّهُ فَاتَّبَعُوهُ..." (سبأ: 20) ظن إبليس فيهم طلع في محله، أول ما شاورلهم وقعوا جري! "وَلَقَدْ صَدَّقَ عَلَيْهِمْ إِبْلِيسُ ظَنَّهُ فَاتَّبَعُوهُ إِلاَّ فَرِيقاً مِنْ الْمُؤْمِنِينَ" (سبأ: 20) أنت حيصدق فيك ظن إبليس السنة دي؟ أوعى! حرام! مش معقولة! " وَلا تَكُونُوا كَالَّتِي نَقَضَتْ غَزْلَهَا..." (النحل: 92) واحدة قعدت تغزل بلوفر تغزل تغزل تغزل تغزل لغاية ما اكتمل عند آخر خيط قامت شدَاه، " وَلا تَكُونُوا كَالَّتِي نَقَضَتْ غَزْلَهَا مِنْ بَعْدِ قُوَّةٍ أَنكَاثاً..." (النحل: 92)، ها؟ كإني عايز أقول لك إيه؟ عايز أقول لك: رمضان إيدالك قوة متضيعهاش! خلي ظن إبليس ما يصدقش فيك السنة دي، يعني عايزني إيه؟ اثبت شوية، إجمد، بلاش المعاصي الكبيرة، حتغلط، بلاش تسيب الحاجات الكبيرة، ماتسيبش صلاة فجر، وماتسيبش الصلاة، وما تسيبش قراءة القرآن ولو جزء قصير، يعني حافظ ولو على حاجات في حد أدنى، بس من فضلك مش يصحى بكرة العيد تضيع في أول يوم العيد تَبَوَّظ كل حاجة! "وَلَقَدْ صَدَّقَ عَلَيْهِمْ إِبْلِيسُ ظَنَّهُ فَاتَّبَعُوهُ..." (سبأ: 20) خليك من بقية الآية "...إِلاَّ فَرِيقاً مِنْ الْمُؤْمِنِينَ..." (سبأ: 20)، امسك نفسك، امسك نفسك في العيد، بلاش الأخطاء الكبيرة، بلاش الكبائر، بلاش ترك صلاة، مش بعد ما كنت بتقرأ كذا قرآن وبتعمل وبتعمل، مش بأقول لك أعمل زي رمضان مش حتقدر طبعًا، ده رمضان، لكن على الأقل الحد الأدنى، بلاش السقوط من الهمة العالية، بلاش تنزل فجأة. دي...خلي بالك، عارف رمضان عامل زي إيه؟ زي موسم الشتا للكائنات. الغابة اللي أنا بأصور فيها دي...أنا بأصور في الأرز. المكان اللي أنا بأصور فيه ده في شمال لبنان، وقت الشتا كل الجبال اللي حواليه دي بتبقى تلج، ينزل...ييجي الشتا يمد الكائنات والمزروعات والكائنات الدقيقة باحتياجاتها للسنة اللي جاية، والكائنات شاطرة وذكية، كل كائن من الكائنات الصغيرة من أول النمل لكل شيء يحافظ على الخير اللي جاله للسنة اللي جاية علشان حييجي الصيف بقى و...ييجي رمضان يمد الأمة باحتياجاتها من الطاقة والقوة للسنة اللي جاية. خليك شاطر، خليك ذكي، حافظ على الخير للسنة اللي بعديها، حافظ على الخير علشان في هموم السنة الجاية، "رحلة للسعادة" علمتك إزاي تواجه السنة اللي جاية، حافظ على الخير والطاقة اللي جاتلك علشان عايز تنجح في مشروعك الخاص وتتوظف وتشتغل وتتجوزي وتعمل وتعمل وتعمل وتنجح في حياتك العملية، عشان عايز الأمة دي تنهض، ما تضيعش رمضان. دي خواطر أخيرة ودي معاني أخيرة.




فاضل آخر معنيين: المعنى الأول؛ هناك حفلة كبيرة حنعملها على عمرو خالد.نت في العيد، حنكرم فيها أكتر ناس عملوا تفاعلات على الموقع أثناء رمضان، حيكون هناك جوائز قيمة منها كروت التحضير اللي قعدنا نشتغل بيها اللي بخط اليد حنبعتها هدايا لأكتر ناس شاركت في البرنامج على النت بتفاعلات وبأفكار، حنعمل حفلة كبيرة أول يوم العيد بالليل الساعة 10 بالليل وتاني يوم العيد كذلك وحنذيع فيها حتت ماإتذاعتش في البرنامج ونعمل حفلة كبيرة ونتفق بقى على خطة "رحلة للسعادة" إزاي نمسك حلقة حلقة ونحط لها خطة، فعندنا شغل كتير على عمرو خالد.نت. الحلقات كلها موجودة، الكتاب كله موجود على عمرو خالد.نت تاخدوا اللي أنتم عاوزينه؛ دي كانت النقطة اللي قبل الأخيرة.
آخر نقطة: يا ترى...سؤال: يا ترى حيكون في برنامج في رمضان القادم؟ يا ترى حنعمل برنامج في رمضان القادم؟ ويا ترى حيكون برنامج رمضان القادم قصة نبي من الأنبياء؟ أو مجموعة أنبياء عشان نكمل "قصص القرآن"؟ ولا يا ترى حيكون رمضان القادم استكمال "باسمك نحيا" واسماء الله الحسنى ولا يا ترى حيكون ده آخر رمضان حنقدم فيه برامج؟ سؤال نتركه للزمن. هل سيقدر لنا الله إن إحنا نلتقي مرة أخرى؟ هل سيكتب لنا الله ذلك؟ ربنا يقدر الخير ويفعل الخير ونكون دايمًا بنقدم رسالة خير وحب وإيمان.
أستودعكم الله الذي لا تضيع ودائعه. ربنا يفتح عليكم ويرضيكم ويبارك لكم ويسعدكم. ده كان هدفنا في البرنامج: ينجحكم في حياتكم العملية، يا رب يا شباب ويا بنات، ابتسموا بقى كده وطاقة أمل واملأ حياتك بإشراق إنك حتنجح إن شاء الله وإن البرنامج ده مكانش بس كلام، لا ده حينجحك في السنة اللي جاية. تنجحوا إن شاء الله، ربنا يسعدكم ويبارك لكم. يجمعنا على خير في الدنيا وفي الجنة اللي هي قمة السعادة. والسلام عليكم ورحمة الله وبركاته.